د نورستان محصلینو د چاپېریال سمسورتیا په موخه ننګرهار پوهنتون کې نیالګي کېنول.
د نورستان محصلینو علمي او فرهنګي ټولنې د پاک او زرغون چاپېریال تامین په پار د ننګرهار پوهنتون په بېلابېلو برخو کې لسګونه زینتي بوټي او ګلان وکرل او ویې ویل، چې په دې کار سره غواړي په محصلینو کې دطبیعت پالنې روحیه پیاوړې کړي.
یاد نیالګي د ننګرهار پوهنتون د اداري او مالي چارو مرستیال، د پوهنتون د چاپېریال ساتنې کمېټې مشر، د کرنې پوهنځي مسؤلینو او استادانو په حضور کې په ټاکل شویو ځایونو کې کېنول شول.
د نورستان محصلینو د علمي او فرهنګي ټولنې استازي ډاکتر محمد نور نوري په وینا، د پاک او زرغون چاپېریال رامنځته کول او د طبیعت ساتنه یوازې د یوې ډلې کار نه دی، بلکې دا د ټولنې د ټولو افرادو ګډ مسؤلیت دی، چې د خپلې سیمې د ښکلا او اقلیم لپاره لازمې هڅې ترسره او خپل مسؤلیت ادا کړي.
د ننګرهار پوهنتون د اداري او مالي چارو مرستیال مفتي نعمت الله اعزازي او د پوهنتون د فرهنګي کمېټې مشر پوهنوال سید اکرم هاشمي په خپلو خبرو کې د یادې علمي او فرهنګي ټولنې ددې اقدام ستاینه وکړه او نیالګیو کېنول یې د پوهنتون چاپېریال په ښکلا او سمسورتیا کې مهم وبلل.
نوموړو زیاته کړه، چې پاک چاپېریال د محصلینو په رواني او فزیکي روغتیا کې اساسي رول لري او د چاپېریال ساتنې اړوند یې د دا ډول فعالیتونو او هڅو ملاتړ وکړ.
