د ننګرهار پوهنتون کمپیوټر ساینس پوهنځي څخه۱۷۲ تنه علمي کادرونه فارغ شول.

د ننګرهار پوهنتون کمپیوټر ساینس پوهنځي له سافټویر انجنیرينګ، ډیټابیس او معلوماتي سیستم او نیټورک او کمېونیکېشن څانګو څخه په ۱۹ مه دوره کې۱۷۲ تنه علمي کادرونه فارغ  شول، چې ټولنې ته به په بېلابېلو برخو کې خدمتونه  ترسره کړي.
په همدې پار د کمپیوټر ساینس پوهنځي له لوري په ستاره شرق هوټل کې مراسم جوړ شوي وو، چې په کې د ننګرهار پوهنتون د علمي چارو او محصلانو چارو  مرستیالانو، د کمپیوټر ساینس پوهنځي رئیس، د بېلابېلو پوهنځیو استادانو، فارغانواو د هغوی د کورنیو غړو برخه اخیستې وه.
د ننګرهار پوهنتون کمپيوټر ساینس پوهنځي رئیس پوهندوی بادام نیازي د خپلو خبرو پر مهال د غونډې ګډونوالو ته ښه راغلاست ووایه، تحصیلي دوره کې یې د فارغېدونکو محصلینوکوښښونه وستایل او په تخنیکي برخه کې یې د یادو محصلینو په مهارتونو، وړتیاوو او لاسته راوړنو خبرې  وکړې.
فراغت غونډې ته د وینا پر مهال د ننګرهار پوهنتون د علمي چارو مرستیال پوهندوی مــــ/ــــولوي احسان الله ناصح د خپلو خبرو پر مهال فارغو محصلینو ته مبارکي وویله او په معاصره نړۍ کې یې د ساینس او ټکنالوژۍ پر اهمیت او ارزښت خبرې وکړې.
نوموړي زیاته کړه، د معلوماتي ټکنالوژۍ په برخه کې پرمختګ کولی شي، د یو هېواد هر اړخیز پرمختګ تامین کړي او په خبره یې د لوړو زده کړو وزارت د تېرو کلونو په پرتله سږ د ساینس او ټکنالوژۍ په برخو کې د څېړنو ترسره کولو لپاره زیاته اندازه بودیجه په پام کې نیولې ده.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي غونډې ته د وینا پر مهال فارغو محصلینو ته د مبارکۍ تر څنګ هغوی ته سپارښتنه وکړه، چې د وخت د غوښتنو سره سم په خپل مسلک کې مخ ته لاړ شي او د نظام د اداري او خدماتي چارو په موثریت کې برخه واخلي.
نوموړي دغه راز محصلین وهڅول، چې راتلونکي کې د خپل پوهنتون سره په اړیکه کې پاتې شي او د پرمختګ لپاره یې هلې ځلې ترسره کړي.
غونډه د پوهنتون رهبرۍ غړو او استادانو له لوري فارغو محصلینو ته د سندونواو ایوارډونو په ورکړې سره پای ته ورسېده.
سرچینه: د عامه اړیکو، اطلاعاتو او نشراتو آمریت