د ننګرهار پوهنتون مشرتابه ددې پوهنتون یو شمېر استادان او اداري آمرین وستایل
د ننګرهار پوهنتون یو شمېر استادان او اداري آمرین، چې د تضمین کیفیت په پروسه کې یې فعال ګډون او هلې ځلې کړې وې، د پوهنتون د رهبرۍ له خوا د ستاینلیکونو په ورکړې سره تقدیر شول.
په همدې اړه د ننګرهار پوهنتون په ریاست مقام کې غونډه جوړه شوې وه، چې ددې پوهنتون رئیس پوهاند دوکتور خلیل احمد بهسودوال، د علمي چارو مرستیال پوهندوی دکتور محمد حامد کډوال، د محصلانو چارو مرستیال پوهندوی سید اکرم هاشمي، د بېلابېلو پوهنځیو رئیسانو او اداري آمرینو په کې برخه لرله.
د ننګرهار پوهنتون رئیس پوهاند دوکتور خلیل احمد بهسودوال د بشپړ اکاډمیک اعتبار اخیستل د پوهنتون د ټولو منسوبینو له ادارې او استادانو نیولې د اداري او خدماتي کارکوونکو پورې د ټولو ښاغلو او آغلو د هلو ځلو او زحمتونو پایله وګڼله.
پوهاند بهسودوال د غونډې له برخوالو د مننې تر څنګ غوښتنه وکړه، چې تضمین کیفیت یوه دوامداره پروسه ده او د پوهنتون د علمي، تدریسي او اداري چارو د کیفیت د لا ښه والي لپاره باید له دې زیاتې هلې ځلې وشي.
د غونډې په دویمه برخه کې د ژبو او ادبیاتو پوهنځي استاد پوهاند جانس زړن، د شرعیاتو پوهنځي استاد پوهاند دکتور برکت الله تایب، د حقوقو او سیاسي علومو پوهنځي استاد پوهاند دکتور نقیب الله ثاقب، د شرعیاتو پوهنځي استاد پوهندوی دکتور نجیب الله صالح، د وترنري علومو پوهنځي استادان پوهنوال ډاکتر سید ضیاءالحق بنوري او پوهندوی احمد فرید روان، د انجنیري پوهنځي استادان پوهنیار عبدالحی کیوان او پوهنیار کرشمه نظیمي، د بشري سرچینو آمر نورحکیم شاه مومند، د تهیه، تدارکاتو او خدماتو آمر غلام نبي عثمانخېل، د دفتر سرپرست آمر غلام حیدر حیدر موسی زی، د مالي او حسابي آمر ګل آغا، د تضمین کیفیت آمر لال آغا جبارخېل، د محصلینو د خدمتونو د انسجام آمر اسلام الدین اخلاص مند، د سپورت او بدني روزنې آمر محمد نسیم کاکړ، د محصلانو چارو آمر عبدالجمیل حاتم، د معلوماتي ټکنالوژۍ او کتابتون آمر سید اجمل نقشبندي، د علمي تحقیقاتو آمر ګل رسول صابر، د روغتیایي کلینیک آمر ډاکتر عبدالواسع زماني، د تضمین کیفیت عمومي مدیر بختي مولا سیدي او د ریاست مقام سکرتر او عکاس غلام رسول غوثي ته ستاینلیکونه ورکړل شول.
د یادونې وړ ده، چې د یادو مراسمو پر مهال د ژبو او ادبیاتو پوهنځي استاد پوهاند جانس زړن او د انجنیري پوهنځي استادې پوهنیار کرشمې نظیمي ته د جمهوري ریاست له خوا د خپلواکۍ د سلمې کالیزې په ویاړ مډال، چې د لوړو زده کړو وزارت له خوا څه موده وړاندې ننګرهار پوهنتون ته رالېږل شوي وو، هم ورکړل شول.
