د ننګرهار پوهنتون مشرتابه ددې پوهنتون د ژورنالېزم او ارتباطاتو پوهنځي د چارو ارزونه وکړه.
ددې ارزونې پر مهال د ننګرهار پوهنتون رئیس سره د علمي چارو، اداري او مالي چارو او محصلانو چارو مرستیالان هم ملګري وو او د یاد پوهنځي په علمي، تدریسي او اداري برخو کې لاسته راوړنو، پرمختګونو، ستونزو، غوښتنو او اړتیاوو په اړه یې معلومات ترلاسه کړل.
د ژورنالېزم او ارتباطاتو پوهنځي رئیس پوهندوی سید سمیع الله سعیدي د پوهنتون رهبرۍ ته د خپل پوهنځي د ترسره کړیو او جاري فعالیتونو، اوسني وضعیت، ستونزو، وړاندیزونو او راتلونکو پلانونو په اړه چمتو کړی پرېزنټېشن وړاندې کړ، چې د یاد پوهنځي هر اړخیز مسایل په کې را اخیستل شوي وو.
ښاغلي سعیدي د خپلو خبرو پر مهال د پوهنځي په علمي لاسته راوړنو، څانګو او کمېټو فعالیتونو، استادانو او محصلینو ته د ظرفیت لوړونې برنامو، محصلینو عملي زده کړو، HEMIS سیستم څخه ګټې اخیستنې، ملي، سیمه ییزو او نړیوالو پوهنتونونو سره پر اړیکو، د محصلینو عملي زده کړو په موخه رسنیو سره پر لاسلیک کړیو توامیتونو، نړیوالو معتبرو ژورنالونو کې د استادانو پر نشر شویو مقالو، ذیربطه ادارو سره پر ګډو څېړنیزو پروژو، نصاب بهبود او ترسره شویو ټولنیزو، فرهنګي او رغنیزو چارو باندې رڼا واچوله.
نوموړي د استادانو کموالی، د محصلینو عملي زده کړو لپاره د مناسبو او کافي وسایلو، سټوډیو او راډیو نشتوالی، د ودانۍ، دفتري وسایلو، درسي موادو کمښت او د مجهز کتابتون نه موجودیت د پوهنځي اساسي ستونزې او دکتورا برنامو ته د استادانو لېږل، شپې برنامې ایجاد، استادانو او محصلینو ته د ظرفیت لوړونې لنډمهاله پروګرامونو چمتو کول، د معیار ورځپانې تر څنګ د یوې مجلې نشر او ماسترۍ برنامې ایجادول خپل راتلونکي پلانونه یاد کړل.
د ننګرهار پوهنتون رئیس شـ/یخ انعام الله مدني، د علمي چارو مرستیال پوهندوی م/ولوي احسان الله ناصح، د اداري او مالي چارو مرستیال پوهنیار قاضي خالد صداقت او محصلانو چارو مرستیال پوهنیار حافظ سید محمدقاسم هاشمي د خپلو ویناوو پر مهال د ژورنالېزم او ارتباطاتو پوهنځي په لاسته راوړنو او پرمختګونو خوښي وښوده او د یاد پوهنځي له مسؤلینو او استادانو یې مننه وکړه.
نوموړو د مسلکي ژورنالیستانو او عامه اړیکو برخه کې د مسلکي کادرونو په روزلو ټینګار وکړ، د چارو لا ښه والي په پار یې د پوهنځي مسؤلینو ته اړینې لارښوونې وکړې او ژمنه یې وکړه، چې د یاد پوهنځي په چارو کې پرتو خنډونو، اړتیاوو او وړاندیزونو ته به پر وخت او لازمه رسیده ګي وکړي.
د مجلس په پای کې د پوهنتون رهبرۍ د ژورنالېزم او ارتباطاتو پوهنځي د مختلفو څانګو او مدیریتونو د چارو ارزونه وکړه.
