د ننګرهار پوهنتون د اړوندو پوهنځیو د ازموینو کمېټو مسؤلینو د پوهنتون مشرتابه سره غونډه وکړه.
په یاده کاري ناسته کې، چې د پوهنتون د اداري او مالي چارو مرستیال پوهنیار قاضي خالد صداقت، د محصلانو چارو مرستیال حافظ سید محمد قاسم هاشمي او د ازموینو مرکزي کمېټې مشر پوهاند دوکتور عبدالحی مقیم هم برخه لرله، د راتلونکو ازموینو لپاره د پوهنځیو په کچه د اړینو تدابیرو نیولو په اړه بحث او پرېکړې وشوې.
د ننګرهار پوهنتون رئیس او مرستیالانو د پوهنځیو د ازموینو کمېټو مسؤلینو ته په راڼه او شفاف ډول د ازموینو د اخیستلو، په خپل وخت د نمرو اعلان، د محرومانو لیستونو شریکولو، تخنیکي وسایلو چمتووالي او نورو مواردو په اړه اړینې سپارښتنې وکړې.
د پوهنتون مشرتابه د ازموینو پروسې د لا بهبود په خاطر د پوهنځیو د مسؤلینو وړاندیزونه او نظرونه واخیستل او په یاده برخه کې یې د شته ستونزو د هواري ډاډ ورکړ.
د یادونې وړ ده، چې د روان سمستر ازموینې به د لوړو زده کړو وزارت له خوا د رالېږل شوې طرحې او د پوهنتون د علمي شورا د پرېکړې سره سم د لیندۍ په ۵ مه نېټه پيل او د یادې میاشتې تر پایه به دوام وکړي.
