د لوړو زده کړو وزارت د دعوت او ارشاد رئیس د ننګرهار پوهنتون او خصوصي پوهنتونونو له مسؤلینو او استادانو سره غونډه وکړه.
د لوړو زده کړو وزارت د دعوت او ارشاد رئیس او ورسره مل هیئت د ننګرهار پوهنتون او په ننګرهار ولایت کې د خصوصي پوهنتونونو له مسؤلینو، استادانو او د دعوت او ارشاد له مسؤلینو سره غونډه وکړه او د دعوتي او اصلاحي چارو د لا ښه والي، مؤثریت او کاري همغږۍ په اړه یې لازمې سپارښتنې او لارښوونې وړاندې کړې.
غونډه د ننګرهار پوهنتون په جامع مسجد کې جوړه شوې وه، چې په پرانیستونکې وینا کې یې د ننګرهار پوهنتون د دعوت او ارشاد امر مولوي اعجازالحق زَلِف راغلي هیئت ته ښه راغلاست ووایه او ډاډ یې ورکړ، چې د پوهنتون رهبرۍ سره په همغږۍ او د دعوت او ارشاد ریاست د پلان له مخې محصلینو، استادانو، اداري او خدماتي کارکوونکو لپاره په دوامداره توګه دیني، اصلاحي، علمي او روزنیزې برنامې ترسره کېږي.
د لوړو زده کړو وزارت د دعوت او ارشاد رئیس شیخ حکمت الله حکمت په خپلو خبرو کې د دعوت او ارشاد د چارو پر ارزښت ټینګار وکړ او ویې ویل، چې د پوهنتونونو علمي چاپېریال باید د اسلامي ارزښتونو، حسنه اخلاقو او سالمې فکري روزنې محور وي او سپارښتنه یې وکړه، چې استادان باید د خپل علمي او تدریسي رسالت ترڅنګ د دعوت او ارشاد مسؤلینو سره په ګډه د محصلینو په عقیدوي، فکري، اخلاقي او ديني روزنه کې فعاله ونډه واخلي.
نوموړي وویل، چې د استادانو مقصد باید محصلینو ته یوازې د مسلکي پوهې انتقال نه وي، بلکې د هغوی داسې روزنه وکړي، چې له علمي او مسلکي وړتیا سره سره په دیني ـ فکري لحاظ غښتلي وي، د حالاتو د سم تحلیل او د دوست او دښمن د پېژندلو وړتیا ولري.
د دعوت او ارشاد رئیس په پای کې ګډونوالو ته سپارښتنه وکړه، چې د اسلام مبارک دین احکام او لارښوونې د خپل ژوند اساس وګرځوي، د نظام د مشرتابه حفظه الله فرامین په پوره اخلاص تطبیق او د نظام ملاتړ وکړي.
سرچینه: د اطلاعاتو، نشراتو او عامه اړیکو امریت
