ننګرهار پوهنتون کې د پایلو پر بنسټ او محصل محورۍ (OBE-SCL) تدریسي تګلارو د زده کړې ۱۲ ورځنی ورکشاپ پای ته ورسېد.
یاد ورکشاپ د پوهنتون د مسلکي زده کړو پرمختیایي مرکز (PDC) په نوښت د سپین غر لوړو زده کړو موسسې استادانو ته جوړ شوی ؤ.
د ننګرهار پوهنتون د علمي چارو مرستیال پوهندوی دوکتور محمد حامد کډوال د ورکشاپ د پای مراسمو کې د پایلو پر بنسټ او محصل محورۍ تدریسي تګلارو په اړتیا او اهمیت خبرې وکړې او زیاته یې کړه، چې د پوهنتون اداره هڅه کوي، چې د تدریس د دودیزو تګلارو پر ځای نړیوالې معیاري تګلارې عامې کړي.
ښاغلي کډوال د مسلکي زده کړو د پرمختیايي مرکز مسؤلینو او د ورکشاپ د روزونکو استادانو څخه د مننې تر څنګ له برخوالو استادانو غوښتنه وکړه، چې ترلاسه شوي مهارتونه د خپلو اړوندو پوهنځیو او څانګو له استادانو سره هم شریک کړي.
د سپین غر لوړو زده کړو موسسې رئیس ډاکتر سبحان الله حمیدي د ننګرهار پوهنتون د مشرتابه مننه وکړه، چې تل یې له دوی سره اکاډمیکه مرسته کړې او په راتلونکې کې یې هم د ورته همکاریو پر دوام ټینګار وکړ.
د غونډې په وروستۍ برخه کې د ننګرهار پوهنتون د رهبري هیئت له خوا ګډونوالو استادانو ته سندونه او د سپین غر لوړو زده کړو موسسې د مشرتابه له خوا د PDCمرکز مسؤل پوهنیار محمد مالیار رحماني او د ورکشاپ روزونکو استادانو پوهنمل دوکتور مسعود موحد او پوهنمل جاوید صاحبزاده ته ستاینلیکونه ورکړل شول.
